លោកស្រីវេជ្ជបណ្ឌិតឱវណ្ណឌីនរដ្ឋលេខាធិការនិងជាអ្នកនាំពាក្យក្រសួងសុខាភិបាលបន្តអំពាវនាវប្រជាពលរដ្ឋកុំឲ្យមានការរើសអើងចំពោះអ្នកឆ្លងខូវីដ១៩ដើម្បីកុំអោយពួកគាត់មានការបាក់ទឹកចិត្តហើយប្រជាពលរដ្ឋទំាងអស់ត្រូវនាំគ្នាប្រយុទ្ធប្រឆាំងនឹងជំងឺនេះជាមួយគ្នា។លោកស្រីឱវណ្ណឌីនបានមានប្រសាសន៍ថាប្រជាជនកម្ពុជាយើងទាំងអស់មិនត្រូវមានការរើសអើងដល់អ្នកដែលបានឆ្លងជំងឺឆ្លងខូវីដ១៩នេះនោះទេដើម្បីលើកទឹកចិត្តដល់ពួកគាត់អោយត្រូវតស៊ូនឹងជំងឺមួយនេះ ហើយពួកយើងនឹងចូលរួមក្នុងការប្រយុទ្ធប្រឆាំងនឹងជំងឺនេះរួមគ្នា ។លោកស្រីបានបន្តអំពាវពាវនាវបែបនេះ ដោយសារតែបច្ចុប្បន្នមានប្រជាពលរដ្ឋកម្ពុជាមួយចំនួន បានឆ្លងជំងឺខូវីដ១៩ ដែលនាំអោយប្រជាពលរដ្ឋទាំងអស់នៅ ខេត្តនិងក្រុងមានការភ័យព្រួយបារម្ភចំពោះរឿងនេះ។ ប៉ុន្តែលោកស្រីបានបញ្ជាក់ថា ការភ័យខ្លាចជ្រុលហួសហេតុពេក រួមជាមួយនឹងការរើសអើងអ្នកជំងឺពុំមែនជាជម្រើសល្អឡើយ។ ដូច្នេះប្រជាពលរដ្ឋត្រូវតែបង្កើនការ ធ្វើអនាម័យអោយបានជាប់ជាប្រចាំតាមការណែនាំរបស់ក្រសួងសុខាភិបាល លាងដៃអោយបានស្អាត ហូបស្អាត ទើបការពារខ្លួនមិនអោយឆ្លងជម្ងឺនេះបាន ។ « សុំកុំឲ្យមានការរើសអើងជម្ងឺនេះគឺសំខាន់ណាស់ ជាទូទៅនៅលើសកលលោកយើងនេះយើងសង្កេតឃើញហើយសូម្បីតែនៅប្រទេសអង់គ្លេសការរើសអើងកាន់តែមានសភាពចេញទៅតាមប្រទេសនីមួយៗ ។ ដោយឡែក នៅព្រះរាជាណាចក្រកម្ពុជាយើង បានអំពាវនាវដល់បងប្អូនយើងទាំងអស់សុំមេត្តាកុំឲ្យមានការរើសអើងយើងត្រូវគិតថាបងប្អូនដែលគាត់មានវិជ្ជមានវីរុសខូវីដ១៩នេះក៏មិនចង់ឱ្យមានដែរ។ប៉ុន្តែវាជាលក្ខណៈមួយដែលកើតឡើងទៅហើយដូច្នេះវិធានការគេមានតែមួយទេគឺយើងចូលរួមទាំងអស់គ្នាដើម្បីទប់ស្កាត់ អ្នកដែលមានហើយគឺកុំឲ្យចម្លងទៅអ្នកដទៃ អ្នកដែលមិនទាន់មានគឺត្រូវខិតខំការពារកុំឱ្យមានជម្ងឺហ្នឹងគឺជាចំណុចសំខាន់ ហើយត្រូវតែចេះចូលរួម ធ្វើម៉េចកាត់ផ្ដាច់កុំឱ្យមានការចម្លងពីបុគ្គលដែលមានចូលទៅក្នុងសហគមន៍របស់យើង » ។
លោកស្រីឱ វណ្ណឌីនក៏បានអំពាវនាវជូនដល់បងប្អូនប្រជាពលរដ្ឋកម្ពុជាទាំងអស់មេត្តាស្ដាប់ដំបូន្មាន និងការណែនាំរបស់ក្រុមគ្រូពេទ្យ ត្រូវចេះការពារខ្លួនឯង ហើយកុំចម្លងទៅអ្នកដទៃ ។
សូមបញ្ជាក់ថាគិតត្រឹមយប់ថ្ងៃទី២០ខែមីនាឆ្នាំ២០២០ក្រសួងសុខាភិបាលបានធ្វើសេចក្តីប្រកាសអំពីលទ្ធផលរកឃើញបុរសចំនួន ៤ នាក់បន្ថែមទៀតមាន វិជ្ជមានវីរុសខូវីដ១៩ ដោយសរុបទាំងអស់នៅកម្ពុជាមានចំនួន ៥១នាក់ហើយ។