ខេត្តសៀមរាប៖ តាមប្រភពមួយបានប្រាប់ថា ជនបង្កដែលបានបើករថយន្តបុកមនុស្សជិះម៉ូតូទាំងកំរោលបណ្ដាលឲ្យស្លាប់យ៉ាងអាណោចអាធម នៅកន្លែងកើតហេតុត្រូវបានគេស្គាល់ឈ្មោះហើយ។
ប្រភពព័ត៌មានដែលសុំមិនបញ្ចេញឈ្មោះបានប្រាប់ថា ជនបង្ក មានឈ្មោះ វ៉ាន់ វីរ៉ុត ធ្វើការនៅក្រុមហ៊ុន សួស្តីហ្វាយណែន ត្រូវជាកូនលោកវ៉ាន់ វីរៈ នគរបាលចរាចរណ៍ផ្លូវគោកនៃស្នងការនគរបាលខេត្តសៀមរាប។ ប៉ុន្តែព័ត៌មានបានទម្លាយថា ជនបង្កបានរត់គេចចេញពីខេត្តសៀមរាបហើយ។ អង្គភាពសារព័ត៌មានយើង មិនអាចទាក់ទងលោក វ៉ាន់ វីរៈ ដើម្បីបំភ្លឺបាននៅឡើយទេ នៅថ្ងៃអង្គានេះ។
សូមជម្រាបថារថយន្តម៉ាស្តា ស៊េរីទំនើបមួយគ្រឿង ពាក់ស្លាកលេខនគរបាល ដែលបើកក្នុងល្បឿនលឿន បានបុកជាមួយម៉ូតូមួយគ្រឿង បណ្តាលឲ្យអ្នកបើកបរម៉ូតូស្លា…ប់ភ្លាមៗនៅនឹងកន្លែងកើតហេតុ។
យោងតាមរបាយការណ៍នគរបាលចរាចរណ៍ ខេត្តសៀមរាប បានឲ្យដឹងថា គ្រោះថ្នាក់ចរាចរណ៍នេះ បានកើតឡើងវេលារំលងអាធ្រាត្រឈានចូលថ្ងៃទី១ ខែឧសភា ឆ្នាំ២០២៣ នៅត្រង់ចំណុច មុខរ៉ូហ្សាណា ស្ថិតនៅលើផ្លូវជាតិលេខ៦ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប។
របាយការណ៍ឲ្យដឹងថា នៅវេលាម៉ោងខាងលើ មានរថយន្តម៉ាក ម៉ាស្តា ពណ៌ ខ្មៅ ពាក់ស្លាកលេខ នគរបាល ២-១២៦០ អ្នកបើកបរដោយជនមិនស្គាល់អត្តសញ្ញាណ មានទិសដៅ ពីកើតទៅលិច លុះមកដល់ចំណុចកើតហេតុ បានបុកម៉ូតូម៉ាកហុងដាវ៉េវ ពណ៌ ខ្មៅ ស្លាកលេខ សៀមរាប ១AH-៣២៤៣ អ្នកបើកបរ ឈ្មោះ លឹម ពុទ្ធាវី ភេទ ប្រុស អាយុ ៣៤ឆ្នាំ រស់នៅផ្ទះជួលភូមិ ធ្លកអណ្តូង សង្កាត់ ស្លក្រាម ក្រុងខេត្ត សៀមរាប មានទិសដៅ ពីលិចបត់ឆ្វេងទៅជើង បណ្តាលឲ្យឈ្មោះ លឹម ពុទ្ធាវី ស្លា…ប់នៅនឹងកន្លែងកើតហេតុ។ រីឯម៉ូតូ និងរថយន្តខូចខាតធ្ងន់ធ្ងរ។
ប្រធានការិយាល័យនគរបាលចរាចរណ៍ផ្លូវគោក នៃស្នងការរដ្ឋាននគរបាលខេត្តសៀមរាប លោក សោម វីរៈ បានឲ្យដឹងថា តាមការពិនិត្យជាក់ស្តែងនៅកន្លែងកើតហេតុ អ្នកបើកបររថយន្តបានបើកបរក្នុងល្បឿនលឿន។ លោកក៏បានបន្តទៀតថា ក្រោយពេលកើតហេតុអ្នកបើកបររថយន្តបានរត់គេចខ្លួនបាត់។ ប៉ុន្តែបើទោះជាយ៉ាងនេះក្តី សមត្ថកិច្ចក៏កំពុងស្រាវជ្រាវ រកអត្តសញ្ញាណអ្នកបើកបររូបនេះផងដែរ។
មន្ត្រីនគរបាលជាន់ខ្ពស់ខេត្តសៀមរាប បញ្ជាក់ថា រថយន្តពាក់ស្លាកលេខនគរបាល ដែលបានបុកមនុស្សស្លាប់កាលពីយប់ថ្ងៃទី៣០ ឈានចូលថ្ងៃទី១ ខែឧសភា នោះ មិនមាននៅក្នុងបញ្ជីឯកសារនោះទេ មានន័យថា ស្លាកលេខក្លែងក្លាយ ហើយជាមួយគ្នានេះ អ្នកបើកបររថយន្តរូបនោះក៏មិនមែនជានគរបាលដែរប៉ុន្តែហ៊ានប្រើរថយន្តអត់ពន្ធ ។
