ភ្នំពេញ៖ លោកបណ្ឌិត ហែម ប្រសើរ ប្រធានសមាគមសម្ព័ន្ធភាពអ្នកសារព័ត៌មានក្នុងសន្តិភាព បានអញ្ជើញសំណេះសំណាល សួរសុខទុក្ខ ណែនាំតម្រង់ទិស និងផ្តល់អំណោយមនុស្សធម៌ជូន លោកស្រី ធី សុផល ចាងហ្វាង គេហទំព័រអធិរាជសម្លេងចៅកម្សត់ និងកូនប្រុសស្រី ដែលទើបមានសេរីភាពពីការឃាត់ខ្លួននៅខេត្តកំពត។
ក្នុងឱកាសនោះ លោកស្រី ធី សុផល បានរៀបរាប់ហេតុការណ៍ដែលឈានដល់ការឃាត់ខ្លួនលោកស្រីនៅខេត្តកំពតជូន លោកបណ្ឌិតប្រធានបានជ្រាប ហើយបានថ្លែងអំណរគុណ និងគោរពជូនពរ លោកបណ្ឌិតប្រធានដែលបានយកចិត្តទុកដាក់តាមដាន និងជួយអន្តរាគមន៍ឱ្យមានសេរីភាពវិញ។
លោកបណ្ឌិតប្រធាន ហែម ប្រសើរ បានផ្តល់ការណែនាំបន្ថែម ឱ្យលោកស្រី ធី សុផល និងបងប្អូនអ្នកសារព័ត៌មានទាំងអស់ ចូលរួមគ្នាផ្សព្វផ្សាយព័ត៌មានល្អៗពីកម្ពុជា សមិទ្ធផលការអភិវឌ្ឍន៍ដែលជាផ្លែផ្កា នៃសុខសន្តិភាព ដោយកាត់បន្ថយការផ្សព្វផ្សាយភាពអវិជ្ជមាននានា ដែលធ្វើអោយកម្ពុជាខូចមុខមាត់លើឆាកអន្តរជាតិ ដោយត្រូវប្រកាន់ខ្ជាប់នូវ ក្រមសីលធម៌ វិជ្ជាជីវសារព័ត៌មាន និងគោរពច្បាប់ លិខិតបទដ្ឋានគតិយុត្តិនានាជាធរមាន។
ទីបញ្ចប់ លោកបណ្ឌិតប្រធាន ហែម ប្រសើរ និង លោក ថាំង ប៊ុនសុង បានប្រគល់អំណោយរបស់សមាគមជូន លោកស្រី ធី សុផល រួមមាន៖
– អង្ករ ៥០គីឡូ
– មី២កេស
– ទឹកត្រីនិងទឹកស៊ីអ៊ីវ ៤យួរ
– ត្រីខ ២ដុំ
-ភួយចំនួន២ និង
-ថវិកាចំនួន $១០០
